Site icon জগন্নাথপুর টুয়েন্টিফোর

পর্ব০২: আগের মাইনষর লাখান অনে মানুষ কোয়াই? অধ্যক্ষ মো. আব্দুল মতিন

(পথে ঘাটে পাওয়া আগের মানুষের জীবনবোধের স্মৃতিচারন  সিলেটের আঞ্চলিক ভাষায়।আঞ্চলিক ভাষার শব্দ এবং উচ্চারনে স্থান ভেদে পার্থক্য রয়েছে।  পাঠকদের বোধগম্যতার জন্য কিছু শব্দের অর্থ  টিকাতে সংযুক্ত করা হলো।  )
বাইরা মাইয়া দিনো  মাইনষে উজাইর মাছ মারতা। উজাই মাররা মাইনষে  ফলো,ঝগরা,কুছা,খলইধরি লগে লইয়া যাইতা। হারারাইত তুফান,ঠাটার মাঝেও  গাঙ্গ,আওরো বারছাইতা উজাইর মাছর লাগি। ঠাটারে  অনে যেলা মাইনষে  ডরাইন ইলা তারা ডরাইতানা। উজাইর মাছ মারলে খলইধরির লগে গাইত্তা বাড়ীত লইয়া আইতা। গোয়াল,গইন্না, কই,হিঙ্গি,মাগুর,টেংরা ঠাটার লগে পাগল অইয়া গালাইয়া উঠতো। অনে আগর মাছও নাই। উজাই ও নাই! রইদ আর মেঘ অইলে ফুরুত্তাইনতে কইতা, ‘রইদ অয়,মেঘ অয়,হেয়ালনির বিয়া অয়’।আশমানেদি  কলা মিশিন গেলে  চিল্লাচিল্লি কইরা হকলে দেখতা আর কইতা,’অউ দেখ কত মুটা কলা মিশিন যার ‘।
মেঘরদিনো দেউরির মাঝে ফুরুততাইনতে মারগুল্লি খেইর খেলাইতা, মুরুব্বি অকলরে দেখলে দৌড়িয়া লোকাইতা,শরম পাইতা। ফুরিন্তে কইন্না খেইর খেলাইতা,কচু পাতারেদি ছাত্তি বানাইয়া মাতাত দিতা।
তুফান আইলে মাইল্লার ফাল অকলে আমগাছর তলে
আম থুকাইতা। আউরো নাও বুরি গেলে হকলে  মিইল্লা মাইষরে বাছানির লাগি চিল্লাইতা, ‘নাউ বুরিগেছেরে জলদি আউগগাও’।নাউর মাঝে নয়া কইন্না দামানও থাকতা।বানদেদি ফানি হামাইলেও হক্কলে মিইল্লা ছিল্লাইতা,আওরো বান ভাইঙ্গা ফানি হামাইজার রে জলদি বান বান্দ; আউগগাউরে বন্দ ফানি হামাইজার।
নয়া মেঘর পানিত ফুরুত্তাইনতে গাঙ্গ,ফুকরিত হাতরাইতা। ফানির মাঝে জুকে ধরলে দেখো কান্দনর বাইছ পরিগেছে, অমাইগো,অমাইগো,আমারে জুকে ধরি লিছে গো; অমাইগো। হকলটি ফানিতাকি উঠবে। মাই কান্দন ফুইন্না দৌড়িয়া আইতা। দেখিবে কুনানো জুকে ধরছে? মাইলেনেওরারে আগেনু কইছলাম ফানিত লামতেনা। অনে খালি মাইগো মাইগো করছ কেনে? আরলামতাম নায়গো মাই ফানিত। তর বাপ আউকাবারিত। আরকছুব অইবনে। নাগো মাই  আরফানিত লামতামনায়গো মাই।
পানির মাঝে যেখানো ডেউলা থাকত ইকানরে মাইনষে ডরাইতা। বাইচ্চান পানিত পরিগেলে মাতাত তুইল্লা ঘুরানি দিয়া কোন লাখান বাচাইতে পারলে
পানিত  খোয়াজ খিজির জানু বেজার নাঅইন এর লাগি টেকা পয়সা,ধান চাউল পানিত ফালাইতা।
বাদলির দিনো চাউল ভাইজ্জা খরই খাইয়া গাল গরম করতা।  হাইঞ্জাবাদে বেটিন ফুকরিত গেলে না করতা। ভুত – পেরতনি লাগি জিব করি। নিধানর দিন জামাই বউয়ে আক্তা দেখো মাইর লাগিগেছইন।… এই অমুকর বউরে মারিলারবে । ইয়া আল্লাহ ইতা ফারেনাবে, ফরার জি জিমাইরে মারতো ফারেনা।হারামজাদির সাঅস দেখো! গোয়াপান আঞ্চিনা করি তাইর লাগি ঘরো থাকতাম পাররামনা। ঘরো আইসিমানতি খালি গুতগুতি করের! অইছে ইতা বাদ দেও। কাইল আনবানে। একদিন গুয়া নাখাইলে কিতা অইতো গো কইন্না বেটি ? ফুরুত্তাইনতে কানরা এবলা বাদ দেও।
[ টিকাঃ বাইরা মাইয়া দিন: বর্ষা মাসের দিন,উজাইর মাছ : বর্ষার নতুন পানিতে আগন্তুক বিশেষ মাছ,হারারাইত: সারা রাত,ঠাটা: বজ্রপাত, অনে: এখন, ডরাইন: ভয়পান,গালাইয়া:মাছের বিশেষ আনন্দ ভ্রমণ,
ইলা: এরকম,ফুরুত্তাইনতে : শিশুরা,আউগগাউরে: জলদি যাও,কলামিশিন: বিমান,হকলটি: সবাই,দেউরি: দুইঘরের মাঝখানের খালি জায়গা, ফুকরি: পুকুর,হাইঞ্জাবাদে: সন্ধ্যা পরে,ডেউলা: পানিতে অশুভ দৈত্য বিশেষ, মাইল্লার ফাল: দুষ্টদের দল,নিধান: হাভাত,আক্তা: হঠাৎ,বেজার: অখুশী,আউকা: আসুক,এবলা : এখন ]

 

20171103_163939.jpg
Exit mobile version